السبت، 25 أكتوبر 2008

إخوانى فى مواجه أمين الحزب الوطنى ... كدب × كدب


السلام عليكم ورحمة الله وبركاته .. ,,

من أسبوع كدا لقيت نفسى قاعد أدام أمين الحزب الوطنى عندنا ...
انا طبعا كنت عاوز الفرصة دى بأى طريقة كانت

ومكنتش متوقع إنها تجيلى بالسهولة دى ... لدرجة إنى اتصل بيه ويقولى اتفضل تعلالى

متفتكروش إنى بقيت حزب وطنى ولا حاجة :) ...

أقولكم الحكاية من أولها ..

كنا هنروح مسابقة إذاعة مدرسة .. فكنا المفروض نعمل تحقيق إذاعى ..
فقولت لمشرف الإذاعة أنا عاوز أعمل
التحقيق دا
فقالى نروح لرئيس مجلس (اسم المركز بتاعنا ) ولا تروح لأمين الحزب الوطنى هنا ؟؟؟!!!


أنا طبعا استغربت حبة ... هوا الكلام دا بالسهولة دى ؟؟؟

المهم انا قولت علطول فى بالى ... انا عاوز اروح لأمين الحزب الوطنى .. قالى ماشى

بس إستغرابى زاااااد اكتر وأكتر ... لما متصلشى بيه علشان يعرف إننا جاين ولا حاجة

المهم يعنى ... أخدت واحد زميلى معايا وكانت الساعة حوالى إتناشر الظهر وقفنا مستنين الأستاذ
علبال ما يجى ...
مرة واحدة لقيناه خارج من مجلس المدينة ... وبيقولنا تعالوا يلا ...
لقيناه واقف عند عربية ( سكودا - أوكتافيا )
ولقيناه بيسلم على واحد وقاله عاوزين نعمل تحقيق كدا معاك علشان فيه مسابقة إذاعة

قالوا تأمرنى يا عم ... انا أستغربت أكتر وأكتر وأكتر .. المهم يعنى الإستغراب دا راح أول لما عرفت
إن الأستاذ بتاعنا أمين لجنة فى الحزب الوطنى :))

أول لما سلم عليه وهاتك يا بوس ... قاله بس معلش عندنا جلسة دلوقتى ...
فقمت قولتله طب حضرتك حتخلص إمتى ؟؟

قالى الساعة تلاتة .. قولته طب خلاص لو سمحت هات نمرتك واتصل بيك النهاردة
وابقى آجى لحضرتك فى مقر
الحزب ..قالى تأمر

المهم .. اخدت رقم التليفون .. وكنت هطير من الفرح .. طبعااااااا مش علشان أخدت الرقم ..
علشان حواجهه واشوف
الكذب بتاعه

روحت الدرس ... وحوت على زمليى وكانت الساعة حوالى أربعة العصر ...
وإحنا ماشين حضرنا أسئلة نااااااااااااااااااااااااااااار

اتصلت بيه وقولته حضرتك فاضى دلقوتى ؟؟؟ .. قالى ماشى تعالا .. انا مستنيك فى مقر الحزب

دخلت المقر بتاع الحزب .. وطبعااااا كان كله فلاحين الى شكلهم مش بيعرفوا يكتبوا ولا يقروا
... فواحد أخدنى وودانى
فى مكتب أمين الحزب


طبعاااااااااااا حصلت مواقف غبية جداااااااااااااااااااااااااااا

مثلا .. فيه حركة وسخة اتعملت ادامنا ... من واحد عضو مجلس محلى .. ومش لزما أقول هيا إيه دا

والمكتب كان عامل زى الخمارة ... كان كله سجاااااااااااااااااااااير


واحد سألنى يعنى .. قالى انتا عاوز الأستاذ ( ..... ) قولتله ايوه , علشان هنعمل معاه تحقيق إذاعى

قالى ورينى الأسئلة كدا ... طبعاااا اتخض جداااااااااااااااااااااااااااااااااااا ...
وقعدت يدعلى حبة حاجات لغوية كدا .. بس
مش فى صيغة الاسئلة

وجا عند سؤال : لماذا الحزب الوطنى يضيق على الأحزاب والجماعات المعارضة ؟؟؟

وقفلى عن كلمة الجماعات .. وقالى دى جماعة محظووووووووووووووورة ...
وهيا مش عاوزة تعمل حزب ولا حاجة ... ووووووو

المهم خليته يقف عند حده ورديت عليه

وللعلم الى هوا صحفى وبرده عضو مجلس محلى ... فى الآخر قالى متشغلشى بالك بالكلام دا
.. انتا لسا صغير ..
وهيدخل فى مشاكل زى ما حصل ليا وانا صغير

قولتله إن شاء الله




أخدت منه شوية معلومات شخصية ...



ودخلته فى الأسئلة المكعبله



: قولتله : لماذا المواطن المصرى لا يشعر بتواجد الحزب فى الشارع المصرى ؟؟


قالى : لالالا ... دا إحنا متواجدين مع الشعب فى القرية والمدينة وفى كل مكان
.. ويقدم ليه الخدمات .... إلخخخخ
( هتسمعوه فى التسجيل )
أول لما قالى كدا ... اتبسمت اوى كدا . من كتر كدبه
طبعاااااا أتكلمتله فى موضوعات ( الدويقة _ الغاز المصرى _ 88 عضو من الإخوان
_ تضيق الخناق على الأحزاب _ هشام طلعت مصطفى _ وجود الحزب فى الشارع
, وحاجات تانية كتير كدا هتسمعوها فى التسجيل )
بس من أهم الإجابات الى انا كنت هفطس على نفسى من الضحك منها ...
1_ بتاع الدويقة .. قالى : الحكومة مش هتقف أدام قدر ربنا ..
قولتله : الحكومة عارفة من الاول بالموضوع دا ...
قالى : إحنا وفرنا ليهم مساكن مبارك .. قولتله : بس كان فيه رشاوى
وناس كبيرة فى البلد أخدتها بمبلغ زهيد ... قالى
لا كلام غلط فى غلط
2_ بتاعت هشام طلعت مصطفى .. قالى : علشان الناس تعرف إن الحكومة المصرية
والحزب بيحاكم الفاسدين .. ودا
دليل إنها بتقدم الناس الى بيعملوا غلط للمحاكمة
3_ الغاز لإسرائيل ... قالى : إحنا بنعدل الإتفاقية دى .. قولتله : منصوص فيها إنها
متتعدلشى لمدة 15 سنة وممكن تتجدد ل 20 سنة .. قالى لا
4_ معبر رفح .. قالى : إحنا خدمنا الشعب المصرى كتير , وحماس أول لما أخدت
السلطة مش بتعمل حاجة وبتقتل فى بعضها وزادتها سوء
5_ 88 عضو إخوان .. قالى .. من الآخر أعضاء الإخوان مفيش أى
خدمات فى الدايرة بتاعتهم .. لأن أعضاء
الحزب الوطنى بيعرفوا يخلصوا الأوراق ...
( وللعلم : إحنا عندنا عضو إخوان وعضو الحزب الواطى.. عضو الإخوان
بيعمل حاجات فى المقر رهيييبة وجولات وحاجات بالهبل .. بينما عضو الوطنى والله العظيم ما شوفته
خااااااااااااااااااااااااااااااااااااااااااااااااالص ولا حتى سمعت إنه عمل حاجة )
وفى الآخر ... قالى انتا جايب الأسئلة منين ؟؟؟!!!
قولتله انا بحب أسمع الأخبار والكلام الى فى الشارع
بس كدا ...... بس كان يوم حلووووو مووووووووووووووووووووووووووووووووت
ومعلش بقا إنى مش هنزل الفديو ... هنزل الصوت بس
وأهديله أحلى أغنيه ممكن يسمعها
الكــــــــــــــــداب بيروح النــــــــــــــــــــــــــــــــــــار
وانتــــــــــــــــــــــا بتكــــــــــــــــــــدب ليل ونهــــــــــــــــــــار
والآن مع التسجيل الصوتى .. وهوا حوالى تلاتين ميجا

http://www.4shared.com/file/67800282/9b32085b/___.html

يا ريت الكل ينزله ويقولى رأيه ... :))

أخووووووووووكم

هناك 10 تعليقات:

مصعب رجب يقول...

خطوة جميلة جدا وجريئة
جزاكم الله خيرا

اخوان من اجل مصر يقول...

ايه يا عم الحاج كده االخوه الصحفيين هايغيروا منك
وعموما متشكرين علي مجهودك الكبير لكشف كذب هذا الانسان
وجاري تحميل الملف الصوتي
وبعد ما اسمعه ليه تعليق تاني

دعوة الفردوس يقول...
أزال المؤلف هذا التعليق.
مش لاقية اسم يقول...

السلام عليكم
مشكور يا استاذنا
بس اية الحاجات الجامدة دى
دة انتى كدة غطيت على الاخوااااان
ماشاء الله ربنا يبارك فيك وتكتش كدب بقيتهم
كل سنة وانتة طيب
تحياتى

غير معرف يقول...

انا كنت مع صاحبى عند الراجل ال......... وانا عايز اقول ان صاحبى نسى يقول ان ال.... قال ان الدايرة اللى فيها اخوان مفهاش خدمات هاهاهاهاها انا عايز اقول ان اناعندى اسم مستعار وهو (البنا) وصاحبى اخترت له اسم وهو (لؤلؤ )بعد اذنكم استخدموهم اخوكممممممممممم

غير معرف يقول...

ايه ياعم ده
الراجل بصراحه واوعي تزعل مني ولا تمسح تعليقي
الراجل غسلك
انت مش عارف ترد عليه خالص
ولا حتي تسأله سؤال
كل اما يقولك صح تقوله ااااه
ده ينفع وعامل لي فيها صحفي اجري ياعم العب بعيد ...............

جنّي يقول...

ياريتهم كانوا كدابين وبس

دا كل العبر فيهم وكل المساوئ والفساد بكل ما تحمل الكلمة من معن كثيرة ..

ربنا يوفقك ..

شكرا وتحيتي

duty_one يقول...

خطوة جميلة جدا وجريئة 100% أخوك أسامة جويدة و أفتح الياهو بتاعك :))

**عاشقة الشهادة** يقول...

انا عايزه اقولك ان الكدب ده حاجة مش جديدة عليهم ده انت تبوص في وشهم تبأه عايز تقول اعوذ بالله من الشيطان الرجيم وربنا يجعل هذا العمل في ميزان حسناتك يارب

**عاشقة الشهادة** يقول...

نسيت اقول لحضرتك ان اللينك بتاع التحميل بايظ جيت افتحه علشان ادونه ظهرت لي الرسالة دي The file link that you requested is not valid.ودي ترجمتها:: وصلة الملف الذي طلبته غير صحيح. ارجو الرد علشان انا عاوزه اسمع التسجيل .وشكرا