الأحد، 13 أبريل 2008

فاكرين أيام ال ......... _ رحمها الله _

السلام عليكم ورحمة الله وبركاته ........

أولا كده يا جماااعة فى الاول ازيكوووووووووووووووووووووووووووو ؟؟؟


وحشتونى بجد ..... إيه رأيكم فى الرومانسية دى ؟؟!!!



كده إنبارح وانا بركب مواصلة كده علشان اروح أجيب لحمة
وانا بدفع الربع جنية للأسطى ....... افتكرت من سنتين

افتكرت وانا فى نفس الموقف وبدفع للراجل بريزة .......

يااااااااااااااااااااااااااااه ...... اكيد الكل هيقولى دا اكيد انتا كنت بتدفع البريزة دى من خمسين سنة فاتت

اقولكم والله يا جماعة دا من أربع سنين ولا حاجة


أيامهما كانت البرزة بتودى أماكن بعيـــــــــــــــدة

والعربية الكبوت الحلوة دى الى أول تركب تبص وراء علشان تبص على الشارع

وأول لما تكون عاوز تقف فى حتى معية هتلاقى عنك زرار كده ..... اتك عليه السواق يعرف الى انتا عاوز تنزل

آآآآآآآه يا أيام زمان الحلوة

كان زمان البريزة دى بتعمل العمايل .........

دلوقتى ولا بتروح ولا بتودى

يا عينى علييكى يا مصر .......



الحزب الوطنى عامل عمايله ... ولا إيه رأيكم ؟؟


انا عاوز اسأل يا جماعة الناس بتوع القاهرة والحتت الحلوة دى .. يا ترا المواصلات فى الشهر

بيدفعوا كام ؟؟!!!


هناك 25 تعليقًا:

اوعى تفكر يقول...

يا بختك بتدفع ربع جنيه بس
يا بختك
ده انا بدفع 1.25 مواصلات
واقل حاجه عندنا يعنى يطلعنى لاول الشارع ب50 قرش
ده انت عايش فى نعيم يارااااااااااجل
الظاهر الناس عنكو غلابه

غير معرف يقول...

السلام عليكم
ازيك يا مصطفى
يبنى هو فيه اصلا مواصلات بربع جنيه دبوقتى
فى القاهرة الراجل بيصرف نص مرتبه تقريبا على مواصلاته هو واولاده ومراته
يبنى السواقين مش زودوا الفلوس لاء قسموا كمان الطريق اللى كان بيتاخد على مرة بقى يتاخد على تلات مرات
ربنا يلطف بينا يا درش

jejemam55@gmail.co يقول...

يااااااااااااااااه
انت قديم اوى كده ليه
دا الربع جنيه قرب ينقرض زى اخواته البريزه والشلن

وواضح انى هقول لابنى
كان فى زمان عمله اسمها الجنيه المصرى
بس يخساره عوموه فغرق .....

إخوانى حتى النخاع يقول...

السلام عليكم


والله يا حاج أوعى تفكر شكلنا كدا فى نعيم


انا مأخذتش واصلات قبل كدا فى القاهرة أو أى حتة غير محافظتى


إحنا عندنا بربع جنية ..
هع هع هع هع هع

رامــــى حجــــاج يقول...

بجد ضحكتنى يا مصطفى

ربع جنيه

هو لسه عايش يا راجل

ده انا شكله وحشنى

مش هو كان لونه أزرق كده برده

يا أخى الواحد قرب ينسى شكله

انا هبعتلك موضوع عامله واحد صحبى فى مدونته عن الموضوع ده هيعجبك جدااااااا
اسمه
العودة لحدود 2005
يا ريت تقرأه هيوريك مدى المعاناه اللى احنا عايشينها
http://matabbat.blogspot.com/2008/03/2005.html
بالمناسبة

انت ساكن فين

عشان احتمال أعزل عندكووووووو

أنت الوضع اللى انت فيه ده يستاهل ان الواحد يحسدك

إخوانى حتى النخاع يقول...

دا عندكوا فى القاهرة يا باشا ..

بجد صعبان عليا الناس الى شغالة فى القاهرة علشان الفلوس الى بتدفعها على المواصلات ..

ربنا يكون فى عونا ..

رامــــى حجــــاج يقول...

هو ليه سيادتك لازم توافق بنفسك على نشر التعليق

ايه حجب الأراء ده يا إخوانى حتى النخاع

هتخلى الناس تاخد عننا فكرة مش تمام يا مصطفى كده

افتح النشر

و خلى اللى يبعت يبعت

إخوانى حتى النخاع يقول...

السلام عليكم أختى من القلب


انا كنت اتكلمت قبل كدا عن الربع جنية ...

بس والله افتكر الى إحنا كنا بندفع بريزة فى المواصلات ..

أيام بقا


تشكرى أختى على الرد

إخوانى حتى النخاع يقول...

السلام عليكم


ازيك يا حاج رامى ؟؟

ايوه .. لونه أزرق :)

انتا هتلاقينى ساكن فى بيتنا
ابقا تعالا

وعلى حكاية موافقتى قبل نشر التعليق
والله مش علشان حجب الآراء ولا حاجة

انا عندى الجهاز تقيل جداااااااا .. والجهاز بيتقل أكتر وأكتر لو فيه صفحة نت فيها كلام كتير اتفتحت

والمدونة فيها صور وكلام كتير ففى ساعات الجهاز بيعلق ..

فأنا لو فتحت لوحة التحكم الرئسية هشوف التعليقات وانشرها ..

وأنا خلى بالك بتعب جداااااا علشان أجيب الصفحة دى ..


وتشكر يا حبيبى

اخوان من اجل مصر يقول...

انت بتفكرني بجدي هو الكان بيقول دايما (فين ايام ما كان كيلو اللحمه ب30قرش اوه اوه )
دايما كده لك حاجات عواجيزي
راجل كبره اصلك
ومع ذلك تعيش لنا تدويناتك الخطيره

مواطن مصرى نايم يقول...

موضوع جميل موضوع الربع جنية ده
بس هى المشكلة فى المواصلات بس ؟
انت كنت رايح تجيب لحمة صح
طب اللحمة من اربع سنين كانت بكام؟
احسبها فى دماغك و انت تعرف ان المواصلات هينة عن غيرها
سلامى ليك يا جميل

إخوانى حتى النخاع يقول...

تشكككككككر يا حاااااج عمرو على الردد



دى كانت أيام زمااااااان يا حاج

ربنا يكرمك يا جدنا


تشكر يا باشا للتعليق

إخوانى حتى النخاع يقول...

انا والله يا مواطن يا نايم بجيب اللحمة ب 35 جنية

يعنى الراجل بيكرمنا فى جنية


والله زى ما بتقول . كل حاجة غلت

ربنا يكون فى عونا

غير معرف يقول...

بسم الله..السلام عليكم ...بجد اللي بيحصل ده حرام..دي تالت مرة اكتبلك والنت يقطع وانا ببعت الرسالة..بجد لو قطع المرة دي ممكن ما ادخلش عندك تاني يلا بأه.."اصل النت عندي حزب وطني"..معلش يا دكتور بس حس بالحسرة اللي انا فيها..المهم يا سيدي الفاضل سالتني ليه بقولك "دكتور"..ودي تالت مرة هجاوبك فيها..علشان انا لما كنت قدك ما كنش لي هم في الحياة الا اني اذاكر علشان ادخل فصل المتفوقين.."لا تقولي عزة الاسلام ولا القدوة الصالحة"ولا تقولي البلد والسيايةوتقدم مصر"ماتولع البلد بالي فيها المهم ادخل فصل المتفوقين..وما عرفتش الاسلام بجد الا وانا في سنة تانية ثانوي..وما عملتش للدعوة الا وانا في اولي جامعة..فلما عرفت سنك حسيت انه قاتني كتير ..ولذلك فاني لا اتخيل اخ متفوق ما شاء الله التزاميا ودعويا"احسبك ولا ازكي علي الله احدا"الا يكون متفوق دراسيا..انا لم احدد دكتور في ايه المهم تتفوق فيما تحب ويكون تفوقك بدرجة الدكتوراه..كفايه اللي جايلنا من تحت راس الاخوة المقصرين في حق دراستهم..ماشي يادكتور؟؟.اما حكاية الربع جنيه فدي غلطتك ان انت روحت تشتري لحمة.لو كنت قعدت في بيتكم ما كنتش هتدفع حاجة خالص؟وما هوش ذنب الحكومة انكم عايزين تاكلوا لحمة!!!

إخوانى حتى النخاع يقول...

ازيك يا أختى ...


والله هوا لزما الواحد يكون متفوق دراسيا ودعويا والتزاميا


وبجد انا نفسى اطلع أشطر مهندس كمبيوتر فى العاااااالم

ادعوووووووولى

وزى ما قولتى إحنا الغلطانين الى إحنا نشترى لحمة

انتى جيبى جهازك وارميه وجيبى جهاز جديد ..


تشكرى على التعليق ..

همس الحياه يقول...

ربع جنية وبريزة كمان يبنى دة انت بقيت قديم خالص دة انا دلوقتى واسمى من الصعيد ادى الراجل جنية ونص لاى مشوار يبصلى ويزعق ويقلى ايدة يا ابله لا ومرة رمى الفلوس فى وش البت اختى كان شكلها تحفة
عارف لما باباك وممتك او جدك يقعد يقولك كنت انزل بالربع جنية اجيب لحمة واجيب بقدونس وعيش وايه ونعمل كفتة ونتغدى ونتبسط وانت من جواك بتضحك لان دماغك مش قادرة تستوعب الكلام الربع جنية يعمل كدة انت هتستهبلونا ......... بالظبط هتحكى لاولادك كدا ان شاء الله فى المستقبل وتقولهم كدا هيبصولك ويضحكوا ...... ومش بعيد يقولوا ياعينى بابا اتجنن

إخوانى حتى النخاع يقول...

ازيك يا حاجة همس ؟؟


انتى لسا مروحتيش الرحلة ولا إيه ؟؟؟


المفروض طالما أنتوا صعايدة أختك مترضاش السواق يرمى الفلوس فى وشها ..

بتفكرينى .. أول لما التاكسيات كانت طلعت عندنا
كنا خمس أصحاب
قولنا كل واحد يدقع ربع جنيه ونأخذ تاكسى للمدرسة
وكان فيه واحد معهوش فلوس
روحنا للسواق وركبنا ... واديناله جنيه

الراجل اتنرفز ... اطلعوا من التاكسى

وزعق وشخط

كانت لوصة يعنى :)

وانا كذا مرة أشوف واحدة بتتعارك مع السواق



تشكرى على التعليق

Unknown يقول...

هوا انا سمعت الاسم ده قبل كده..اه ،الربع الجنيه..الازرق الورق ده.لا ..هو دا مش اتلغى..انا سمعت انه هيتحنط وبعدين ربع جنيه ايه يا مفترى
بقى احنا بنشتكى من ان ازازة الزيت بعشرة جنيه وانت تقولى ربع جنيه

إخوانى حتى النخاع يقول...

والله صحيح ....

إحنا إيه الى يخلينا نتكلم عن الربع جنيه وسيبنا الزيت ؟؟!!1


تشكر يا حبيبى على الرد

محاولة لكسر الصمت يقول...

بريزة!!!!..ماشي ولا تزعل نفسك...الحكومة ما يرضهاش تبقى زعلان كده....يعني لو الحكاية حكاية عملة معدنية....أهي الحكومة عملتلك الجنيه بجلالة قدره حديييييييييييييد

*سمر* يقول...

فعلا رحمها الله ..كانت طيبة اوى ..
بريزة ايه بس دلوقتى ..هو الاسم ده مش اتلغى من فتره كده ؟؟
وبعدين احمد ربنا ان انت فى عصر الحزب اللى عامل عميله ده ..وبتركب المواصلات بربع جنيه ...
اما عن اسعار المواصلات عندنا فى القاهرة ..خد عندك :
مترو الانفاق ب 1 جنيه مصرى .
الاوتوبيس الاخضر الحلو ده ..بجنيه وبريزة ..مش عارفى البريزة دى بتحسسنى انى مش هقدر اكمل لاخر الشهر ..
الميكروباصات : تبدأ بخمسين قرش ..وتنتهى ب 2 جنيه فى بعض الاحيان
ال cta 250 قرش ..مصرى برده :)
التوكتوك ..وهو مكون حديث نسبيا لسه مجربتوش الحقيقية ..بس تقريبا التوصيلة بصميطتين وحتة جبنة :)))
اما عن التاكسى ....ياه ..انا مش فكرة سمعت الكلمة دى من كام سنه كده ..هى يعنى ايه ؟؟ :)))

والمواصلة الوحيده اللى بربع جنيه ..هى الترام الزقزوقة اللى حاليا موجود فى المتحف المصرى

كان هذا وصف تفصيلة لحالة المواصلات فى محافظة القاهرة

http://wa7di-ofakker-137.blogspot.com/

ام يحيي يقول...

بلاش اقولك بقا يا اخواني عن مصاريف اتوبيس يحيي ويمني
هه..ربنا يعينك يا أبو يحيي

إخوانى حتى النخاع يقول...

على رأيك يا حاجة دواير

لو على حاجة معندية أهى .. الحكومة عملت لينا جنيه معدنى

تشكرى للتعليق

إخوانى حتى النخاع يقول...

على رأيك يا حاجة دواير

لو على حاجة معندية أهى .. الحكومة عملت لينا جنيه معدنى

تشكرى للتعليق

إخوانى حتى النخاع يقول...

دا انتى كدا يا سمر وضحتى كدا كل حاجة

ربنا يكون معاكوا

يعنى عندكوا مفيش ربع جنية ؟؟!!

والله يا جماعة البريزة بتجيب مستيكايه مش بتخلص غير بعد يومين تلاتة


وعلى حكاية التوكتك .. انا ركبته
كنت بزور واحد من النت .. ركبنى تكتك
بس يااااااااااااااااااااه.. كان متععععة

تشكر على الرد