الجمعة، 5 يونيو 2009

10 ساعات إعتقال .. من أجل محبوبتى

السلام عليكم ..,,


النهاردة ححكيلكم على يوم من أيام حياتى .. كان أغرب يوم فى حياتى .. مش مصدق لغاية دلقوتى إنو حصل ... وحصل إزاى .. وإزاى كانت نفسيتى .. وإزاى وإزاى وإزاى وإزاى .... بالرغم من كدا عمرى ما هنساه وهتنى فاكره لحظة بلحظة


*****************

التاريخ : 9/1/2009


اليوم : يوم الجمعة ( جمعة الغضب )

الحدث : مظاهرة للتضامن مع أهلنا فى غزة فى يوم جمعة الغضب التى دعا إليها الشيخ يوسف القرضاوى


كنا بالظبط الساعة ستة بتوقيت الشتا ... قولنا نستنى فى مكان معين كدا .. وتنطلق المظاهرة من بعد المغرب بوقت بسيط , انا كنت متحمس جداااا وكنت فى كامل نشاطى وإشتياظ قلبى غضبا لما يحدث فى محبوبتى غزة , أخدت كام واحد زميلى بعيد عن موقع المظاهرة وقعدنا بنتكلم حبة كدا لغاية لما حان وقت المظاهرة .


المظاهرة ابتدت وكان العدد فى الاول لابأس به ... وقامت المظاهرة , وكان هناك أخوات , بدأنا بالهتاف والتكبير والناس الى فى الشوارع انضموا لينا وناس قعدت تصور بالموبيال بتاعها .


بعد لما مشينا بخمس دقايق كان العدد وصل خمسة آلاف ...وكانت المظاهرة كبيرة جدااا الحمد لله .. والحمد لله لم يكن فى الوقت دا أمن ولا أى حاجة من الحاجات دى .


بس أول لما وصلنا عند منطقة معينة وكانت المنطقة دى آخر منطقة المفروض المظاهرة توصلها , لقينا عربيات أمن مركزى بالهبل ومطافى وجنود أمن مركزى ومخبرين .. بس شكلهم مكنوش ناوين على حاجة .


خلصنا المظاهرة على خير ومكنشى فيه أى حاجة الحمد لله .. بس للأسف بعد المظاهرة شردت انا وواحد زميلى وكنا اتنين بس وشردنا كمان فى المكان الى فيه عربيات أمن مركزى.


فوأنا ماشى لقيت واحد ظابط هضبة كدا زقنى جااامد وبيقولى : انتا رايح فين يالا .. امشى من هنا ياض .


صراحة انا محسيتشى بنفسى الى وانا قاعد اهزء فيه وقاعد اشوحله وحاجات كدا ... وبرده محستشى بنفسى إلا وكفه جى على خدى


كانت حاجة رهيبة جداااا .. والنظارة لقيتها وقعت منى واتفرفتت حتت .. لدرجة إن والله كعب الشبشب الى انا لابسه اتخلع , ومتسألونيش إيه دخل الشبشب وبالقلم الى ضربهولى .


انا قولت طالما العملية بايظة بايظة ... كملت زعيقى فيه .. ومرة واحدة لقيت حوالى ست مخبرين نازلين عليا .. وكل واحد عاوز يمسكنى , فكل واحد يمسكنى من الحتة الى يلاقيها فاضية , لدرجة إن واحد مسكنى من قصبة زورى .


*****************************

فى البوكـــــــس


المهم اتمسكت وطلعت على البوكس .. بس وانا طالع على البوكس كنت مخبى فى السويتر بتاعى يافطة قماش مكتوب عليها ( لن تركع غزة ) ووقعت منى وانا داخل البوكس ومخبر مسكها .


أول لما دخلت عربية البوكس كان فيه خمسة كمان ممسوكين .. بس مكنشى ليهم علاقة بالمظاهرة ولا حاجة .


فأنا كنت عاوز اعرف الإخوة الى انا اتمسكت .. فقولت اطلع أديا من الشباك بعلامة النصر واكيد الناس هتعرف إن فيه حد من الإخوة اتمسك .. فأول لما طلعت اديا بإشارة النصر , لقيت واحد عسكرى على ما اعتقد بيدلعوه وبيقلوله يا ( ظلط ) قام ضربنى فى عنيا بالبوكس وقالى كلمة والله العظيم ما هنساها أبدا فى حياتى .. قعد يقولى :"يلعن أبو فلسطين على الى جاب فلسطين ... هيا يعنى عملتلنا فلسطين دى حاجة ؟؟) ... أخدت الكلمة دى وقعدت ترن فى مخى طول ما انا فى اللبوكس .



بعدين لقيت نفسى أدام قسم الشرطة بتاعت المركز بتاعتنا ... ونزلنا من البوكس وكأننا حرامية وكنا بنشرب حشيش ومسكونا متلبسين ..


ل واحد عسكرى عاوز يعمل شاطر علينا ويقعد يقولنا .. مفيش حد يبص وراه .. وكل دا وإحنا فى الشارع

*********************************


فى قســـم الشرطــة


دخلنا بعد كدا القسم بتاع الشرطة ... وما أدراكم ما هى أقسام الشرطة .. كانت الساعة حولى 7.5 .. يعنى بعد العشا بحبة


دخلنا إحنا الستة قفص صغير كدا .. والحمد لله انا كنت هاادى جداا لإنى عارف إنى مش ممسوك فى حشيش ولا ممسوك وانا بسرق .


كل شوية واحد يجى ياخد بيانتنا ... وانا مكنتش لسا طلعت بطاقة لإن سنى مكنشى جايب بطاقة



فأول لما قولت اسمى ... لقيتهم بيقولى : آآآآآه ... انتا أبوك الأستاذ (..............) ... لقيت نفسى بضحك ضحكة خخفيفة وبقولهم : آه إن شاء الله .



وطبعا انا اتهريت تفتيش ... وبتاع أمن الدولة قعد يقولى فين أبوك وفين أخوك ؟


المهم لقيتهم نزلونا من قسم الشرطة .. وركبنا عربية ترحيلات إحنا الستة ..وروحنا لمقر أمن الدولة عندنا


******************************

فى مقر امن الدولـــة



أول لما نزلنا أخدونا فى الحجز ... وطبعا الحجز كان معفن جدااااا وكانت الدنيا ضلمة جدااااااااا وكانت ساعتها حولى الساعة 8


المهم كانوا بينادوا على كل واحد ياخدوا بيانتهم ...



بعدين كان بتاع أمن الدولة عاوزنى لوحدى .. أول لما دخلته الحمد لله مكنتش خايف منه ولا أى حاجة .. وكنت قريب جدااا من مكتبه , لقيته هب فيا مرة واحد وقعد يقولى : ارجع يلا ورا .. كتكم الأرف ( أنا قولت بلاش ارد عليه . علشان لو رديت عليه ممكن أضربه :)))) )



قعد يسألنى بقا .. : انتا كنت بتعمل إيه فى المظاهرة وليه كنت ماشى فيها وليه كنت بتهتف معاهم



بعدين سلمنى لواحد ميرى يطلعنى برا المكتب حبة ... المهم أول لما طلعت برا لقيتهم ماسكين واحد من مركز تانى .. ومغمين عنيه وموقفين حراسه عليه.


انا شوفت المنظر دا من هنا .. وقولت فى نفسى :" أشهد أن لا إله إلا والله وأن محمد رسول الله "


بس كان الميرى دا كان طيب ... قعد يكلمنى حبة وقبل إنى أسأل الى متغمى عن المركز الى بيقيم فيه .


بعدين دخلت الحجز تانى .. وبعد حبة أخدوا واحد مننا وغموه وقعدوه حوالى نص ساعة كدا بعيد عننا ... وبعدين عرفنا الى هوا طلع .



بعدين لقينا واحد بيقولنا متخافوش كلكم هتطلعوا .. انا بقا حمدت ربنا .


بدأوا فعلا يأخذوا واحد واحد ويطلعوه لغاية لما اتبقيت لوحدى فى الحجز لما يزيد عن حوالى نص ساعة .... فزهقت , فنمت فى الحجز .


لقيت واحد بيفتح الحجز وبينادى اسمى .. وخرجت معاه .. ولقيته بيدخلى عربية ترحيلات .. والمصيبة إنى كنت لوحدى فى عربية الترحيلات ومش عارف هيخدونى فين .


************************************

فى عربية الترحيلات


وانا مكنتش متصور إنى أركب عربية ترحيلات كبييييييييرة ولوحدى ... ويقفولى الباب .. ويكون فى حراستى طقم كامل من قسم الشرطة وظابط أمن دولة .

وانا فى عربية الترحيلات .. سألتهم إحنا رايحين فين .. قالولى منعرفشى ..


لغاية لما وصلنا لمدخل مدينة ... المهم عرفت إن انا فى دمنهور .

*******************************


فى مقر امن الدولة




أول لما دخلت مقر امن الدولة هناك .. أخدونى جوا ..


ولقيت واحد جا وغمانى ..ومشيت معاه لغاية لما دخلت عن بتاع امن الدولة بتاع دمنهور اسمه ناجى الجمال , وناجى دا من حوالى شهر ألقى بأخ من دمنهور من الدور الرابع .


المهم .. أول لما دخلت .. لقيت ناجى بيقوله مش دلقوتى .. فوقفت حبة صغيرين كدا عند باب المكتب وبعد حوالى تلت ساعة دخلت ليه .. وكل دا وانا مازلت متغمى .


أول لما دخلت عليه .. قالى اتفضل .. وقعدت على الكنبة .. ويالها من كنبه .. إنها كنبة الأحلام ... كنبة حرييييييييرة .. الى يقعد عليها ينااااااااااااااااام .


المهم قالى شيل العصابة من على عنيك .. فشيلتها وقعدت يسألنى حبة اسأله عن أبويا وعن نفسى ورأى فى الإخوان وعن المدرسة وانا ليه رشحت نفسى علشان أكون رئيس إتحاد و..وو..و..و..و..و..و..و


بعدين قالى .. والله العظيم لولا ( ..........) كنت هعملك محضر شغب وانا معايا الأدلة اهى ( وكانت معاه اليافطة الى وقعت منى وبوستر عن غزة ) وقالى كنت هرحلك القاهرة ..بس النوبة الى جاية والله العظيم مانا سايبك .


المهم خرجت من عنده .. بس أول لما خرجت لقيت واحد من بعيد زى أبويا كدا .. انا هرشت فى دماغى .. قولت طب إيه الى جاب أبويا ؟؟

لو كانوا مسكوه كانوا هيودوه أى معتقل بعيد .... المهم قعدت مع حبة عساكر ميرى ويتكلموا وان اسمع وقعدنا على كدا حوالى ساعة

لقيت بعد كدا الراجل بتاع امن الدولة الى فى المركز عندنا بينادينى .. فروحتله .. لقيت أبويا معاه .

طبعا.. سلمت على أبويا واخدنى حضن صغير كدا ... المهم بعد كدا ركبنا عربية بيجوا مع بتاع امن الدولة وروحنا البيت .

وبعد لما نزلنا لقيته بيقول لأبويا : معلش يا أستاذ ( .........) تعبناك معانا !!

انا كنت واقف وقاعد ابصله وانا مذهوووووووووووووووووووووووووووووووووووووووول جدااااااااااا من الكلام دا .

وبعدين الحمد لله روحت البيت بسلام .. وكانت حوالى الساعة 3.5 بالليل .



********************

من ضمن الحاجات الطريفة ..

1_ ساعة لما كنت فى قسم الشرطة وهما بيفتشونى .. كان معايا حبة ورق ناس هيا الى كتباه ليا .. فبتاع أمن الدولة اخد الورق دا

وراح على ورقة واحد كان كتبهالى وبيقولى .. مين الى كاتب الورقة دى .. قولته مش انا


راح على ورقة واحد برده كان كاتبلى فيها إنى أحبك فى الله .وقالى مين الى كاتب دى .. قولتله مش انا


راح على ورقة كان مكتوب فيها إذاعة مدرسية .. قالى مين الى كاتب الورقة دى .. قولتله مش انا


لقيت كان عاوز ينط فيا .. : انتا ياض بتستهبل ولا إيه ؟؟ ولا انتى امى .. ولا انتا إيه نظام يلا ؟!!
**************************
بس فعلا .. ربنا بيقف مع الواحد فى المواقف دى .. يعنى انا الحمد لله اتاخد فى البوكس وبعدين فى عربية ترحيلات كاااااملة لوحدى .. والحمد لله ... ربنا كان مثبتنى ومخفتش ولو للحظة واحدة




دا فعلا كان يوم عمرى ما انساااه ... بس من أجلك يا حبيبتى يا غزة


















هناك 22 تعليقًا:

إيمان بنت الحرية يقول...

هههه
عايزة اقولك تعيش وتاخد غيرها
بس لاء تعيش وتاخد احسن منها ان شاء الله
ما هو كله فى ميزان حسناتك ..

بس بجد شكلك اتضربت جامد اوى ف اليوم دة .. بس اهم حاجة النضارة ؟؟
حصل لها ايه بعدين ؟؟

يلا ربنا ينتقم منهم يارب
ويوريهم ايام سودة زى اللى بيورها لكل الاخوة ..
حسبنا الله ونعم الوكيل

وحمد لله على السلامة ..-مع انها متاخرة اوى -

إخوانجى وأفتخر يقول...

الله ينور يا عم مصطفى و ربنا يجعلة فى مزانحسناتكم اللهم أمين.
أخوك:أسامة جويدة

Qatarat Nada يقول...

حسبي الله ونعم الوكيل
لو فضلت اتكلم مش حخلص كلام فيهم
ونعم الحكومة صحيح
عماااااااااار يا مصر
الله يكون في عونك
بس تعمل ايه
جهلة
اه والله جهلة
مايعرفوش روح الحرية وروح الجهاد في سبيل الله
والله اتمنى اكون اخدت انا الضرب دة او اكون مكانك
ونعم ثوابك عند ربنا
ربنا يجعله في ميزان حسناتك
حمدا لله على سلامتك

انا مش معاهم يقول...

نفس اللي حصل معاي
هو انت من الاخوان ولا ايه

وحي القلم يقول...

السلام عليكم

ايه يا عم ده أول زيارة تقولي اعتقال وحاجات كبيرة

لا أنا عندي عيال هههههههههههههه

فعلا من أجل غزة هنعمل أي حاجة

ان شالله نموت في سبيل الله

اللهم آمين

تقبل مروري

GiGi world يقول...

ياربي
ربنا يحفظك
لكن بترجاك تاخد بالك من فنسك اكتر من كده وتحاول ماتصطدمش بالامن الشطاره انك تاخد اللى انت عايزه من غير ماتروح فى مشكله واقسام
ومش الاهم برده انك تعمل اللى انت عايزه
مش الاهم تصطدم بالامن
ربنا يحفظكويرضى عنك ويهديك للخير يارب

**عاشقة الشهادة** يقول...

بسم الله الرحمن الرحيم
أحب اقول لحضرتك حمدا لله على السلامة ولكن تذكر النية دائما وتذكر ان ما حدث لك هو في سبيل نشر الدعوة وجعله الله في ميزان حساناتك يا رب العالمين وحسبنا الله ونعم الوكيل فيهم... ومش عايزه اكمل كلام عليهم علشان لو تكلمت
مش حخلص كلام

النجمه الهادئه يقول...

السلام عليكم

حسبى الله ونعم الوكيل وان شاء الله فى ميزان حسناتك


فى رعاية الله

إخوانى حتى النخاع يقول...

إيمان ..

والله لو أعيش آخد غيرها فى دعوة ربنا .. موااااااااافق

ووالله العظيم المعتقل دا أحسن درس تربوى فى العاااااااالم كله

ميعرفوش الا الى دخله بسسس


واانا الحمد لله اتضربت بس وانا فى الشارع وفى البوكس بس .. هما يقدروا يمدوا أديهم عليا ولا إيه ؟؟ :))

والنضارة طبعااااااا اتفرمت .. ححط صوره ليها إن شاءء الله فى البةست االى جى دا

ويا رب ينتقم منهم



شكراا ليكى على التعليق

أخوووووووكى

إخوانى حتى النخاع يقول...

إخوانجى وأفتخر


أزيك يا أووووووس ؟؟!!


منا ومنكم ياعم


بقولك ... هات اميلك علشان انا خلاص عفيت عنك وشيلت عنك الأجنووووور


هههههههههههههههههههه


علشان تعرف الى انا أول لما بتكلم بنفذ

بس بوووووق بس !!

إخوانى حتى النخاع يقول...

جنة ..

أه والله يا أختى .. جهله

على حكاية الجهل دى

أول لما ودونى دمنهور .. كنت قاعد وسط عساكر ميرى

فواحد بيسألنى هما كانوا بيقولوا إيه فى المظاهرات ؟؟

فقولتله وانا إيه الى عرفنى .. بس كنت بسمعهم بيقولوا نصر الإسلام قادم

فرد عليا وبيقولى : إيه الهبل دا ؟؟ هما مش فى الدنيا ولا إيه ؟؟ مهو الإسلام موجوود من زماااااااان وإحنا مسلمين أهو


انا كنت عاوز أقوله ابعد من أدامى يا عم الجاهل



يلا ... وحصل خير إن شاء الله

شكراا ليكى أختى للتعليق

أخووووكى

إخوانى حتى النخاع يقول...

انا مش معاهم ..


أه يا باشا .. مهو انا قريت البوست بتاعك


وانا الحمد لله من الإخوان

إخوانى حتى النخاع يقول...

مصعب ..


أزيك يا باشا ؟؟!!


عاوزين يا عم نكون سوخنين يا عم

وعقباااااااااااااااااالك :))


تشكر يا حبيبى على الرد

أخوووك

إخوانى حتى النخاع يقول...

جى جى ..


مهو انا فعلا كنت غلطان جدااااااا..

بس هيا الحماسة أخدتنى جاااااااامد


يلا ... قدر الله وما شاء فعل


شكراا ليكى أختى على التعليق

أخوووووووووكى

إخوانى حتى النخاع يقول...

عاشقة الشهادة

إن شاء الله نيتها كانت لله ....


شكرااااا ليكى أختى الكريمة على التذكير المهم دا الى فيه ناس كتير وممكن أكون انا أولهم فساعات بننساه


وشكراا ليكى على التعليق

أخووووووكى

إخوانى حتى النخاع يقول...

النجمة الهادئة ..

شكرااا ليكى أختى على التعليق ..



أخووووكى

أحمد بسام يقول...

T2bl allah ya mostfa w isa fe mezan 7snatk d3watk
sorry bec i write franco arab

إخوانى حتى النخاع يقول...

أحمد بسام


دا انتا يا باشا تنوور

حتى لو كتبتلنا هيروغليفى

:)

تشكر يا حبيبى على الرد

غير معرف يقول...

المهم انك تكون صحيت من النوم واحلام سعيده

إخوانى حتى النخاع يقول...

دا يا باشا بحق وحقيقى


هههههههههههههههههههه

امال انتا مفكر هزار ولا إه ؟؟!!! :)

غير معرف يقول...

والله بكيت يا مصطفى حسبى الله ونعم الوكيل فيهم انا سيف يا مصطفى

غير معرف يقول...

والله بكيت يا مصطفى حسبى الله ونعم الوكيل فيهم انا سيف يا مصطفى